განცხადებები
განცხადება საქართველოში ავტომობილის ემისიის Euro 5b სტანდარტის შემოღებასთან დაკავშირებით
„საქართველოში ავტომობილის პირველადი ან დროებითი რეგისტრაცია შესაძლებელია მხოლოდ იმ შემთხვევაში, თუ იგი აკმაყოფილებს მინიმუმ:
• Euro 5 სტანდარტს იძულებით აალებადი (ბენზინის) ძრავის მქონე მსუბუქი ავტომობილებისთვის;
• Euro 5b სტანდარტს შეკუმშვით აალებადი (დიზელის) ძრავის მქონე მსუბუქი ან მსუბუქი სატვირთო/სამგზავრო ავტომობილისთვის;
• Euro V სტანდარტს მძიმე ავტომობილებისთვის.
შესაბამისი რეგულაცია (საქართველოს მთავრობის დადგენილება N238; 28.06.2023; იხ. დანართი) ძალაში შევიდა 2024 წლის 1 იანვრიდან მსუბუქი ავტომობილებისა (M1) და მიკროავტობუსებისთვის (M2), ხოლო 2025 წლის 1 იანვრიდან იგი ძალაში შევიდა სატვირთო ავტომობილებისა (N1, N2, N3) და ავტობუსებისთვის (M3).
ცხრილში მოცემული საზღვარგარეთის ქვეყნებიდან საქართველოში იმპორტირებული (გარდა 1 წლამდე) ან/და აღნიშნულ ქვეყნებში რეგისტრირებული და შესაბამის წელს გამოშვებული ავტომობილები გაივლიან საქართველოში რეგისტრაციას ისევე, როგორც გადიოდნენ 2024 წლის 1 იანვრამდე. ასევე გაივლის დროებით რეგისტრაციას N3 კატეგორიის სატვირთო ავტომობილიც, მიუხედავად ექსპორტის/რეგისტრაციის/წარმოების ქვეყნისა და გამოშვების წლისა.
ქვეყანა | ავტომობილისგამოშვებისწელი |
ევროკავშირის წევრი ქვეყნები | ≥2013 |
დიდიბრიტანეთისა და ჩრდილოეთ ირლანდიის გაერთიანებული სამეფო | ≥2013 |
შვეიცარიის კონფედერაცია | ≥2013 |
ნორვეგიის სამეფო | ≥2013 |
ამერიკის შეერთებული შტატები | ≥2013 |
იაპონია | ≥2013 |
კორეის რესპუბლიკა | ≥2013 |
თურქეთის რესპუბლიკა | ≥2013 |
კანადა | ≥2013 |
ჩილეს რესპუბლიკა | ≥2013 |
ავსტრალიის თანამეგობრობა | ≥2016 |
რუსეთის ფედერაცია (2022 წლამდე რეგისტრირებული) | ≥2016 - ≤2021 |
სინგაპურის რესპუბლიკა | ≥2017 |
არაბთა გაერთიანებული საამიროები (მხოლოდ N3 კატეგორიის ავტომობილები) | ≥2021 |
ისრაელი | ≥2013 |
ჩინეთის სახალხო რესპუბლიკა | ≥2018. |
სხვა ავტომობილების რეგისტრაციისთვის საჭიროა საქართველოს გარემოს დაცვისა და სოფლის მეურნეობის სამინისტროს მიერ გაცემული დასკვნა, რომლითაც დასტურდება ავტომობილის გაფრქვევების (გამონაბოლქვის) ზღვრული ნორმების ამ რეგლამენტის მოთხოვნებთან შესაბამისობა. კერძოდ, აღნიშნული დასკვნა საჭიროა:
1. ცხრილში მოცემული ქვეყნებიდან იმპორტირებულიან/და აღნიშნულ ქვეყნებში წარმოებული არარეგისტრირებული ერთ წლამდე ასაკის ავტომობილებისთვის;
2. ცხრილში მოცემულ ქვეყნებში სათანადო წელს წარმოებული ერთ წელზე მეტი ასაკის ავტომობილებისთვის, რომლის იმპორტი ხორციელდება სხვა ქვეყნიდან;
3. ცხრილში მოცემული ქვეყნებიდან ექსპორტირებული ან ამ ქვეყნებში წარმოებული მითითებულ წელზე უფრო ადრე გამოშვებული ავტომობილებისთვის. რუსეთის ფედერაციიდან იმპორტირებული ავტომობილის შემთხვევაში დასკვნა საჭიროა 2016 წლამდე და 2021 წლის შემდეგ გამოშვებული ავტომობილებისთვის, ასევე 2016-2021 წლებში გამოშვებული რუსეთში არარეგისტრირებული ავტომობილებისთვის;
4. ცხრილში მოცემული ქვეყნების გარდა ნებისმიერი სხვა ქვეყნიდან (მაგალითად: ინდოეთი, არაბთა გაერთიანებული საემიროები, სომხეთი, აზერბაიჯანი, უკრაინა, უზბეკეთი, ირანი და ა.შ.) იმპორტირებული ან ამ ქვეყნებში წარმოებული ავტომობილისთვის (მიუხედავად ასაკისა).
სამინისტროს დასკვნის გარეშე გამონაკლისის სახით შესაძლებელია იმ ავტობუსებისა (M3 კატეგორია) და სატვირთო ავტომობილების (N1, N2, N3 კატეგორია) რეგისტრაცია, რომლებიც 2025 წლის 1 იანვრამდე შემოსულია საქართველოს ტერიტორიაზე ან დაწყებულია ტრანსპორტირება.
საქართველოს გარემოს დაცვისა და სოფლის მეურნეობის სამინისტროს დასკვნის მისაღებად საჭიროა სამინისტროს წარედგინოს Euro 5/5b/V-ს ან უფრო მაღალი სტანდარტის დამადასტურებელი შემდეგი სახის დოკუმენტაცია:
1. ცხრილში მოცემული ქვეყნებიდან იმპორტირებული ან/და აღნიშნულ ქვეყნებში წარმოებული არარეგისტრირებული ერთ წლამდე ასაკის ავტომობილებისთვის:
•ან/და ავტომობილის მწარმოებლის მიერ გაცემული შესაბამისობის სერთიფიკატი (CoC - Certificate of Conformity). შესაბამისობის სერთიფიკატზე მწარმოებლის გარდა ასევე შეუძლიათ მიმართონ შუალედურ კომპანიებს, რომლებიც სთავაზობენ მომსახურებას ონლაინ, თავად უკავშირდებიან მწარმოებლებს და შეუძლიათ შესაბამისობის სერთიფიკატის ასლის მოწოდება. შესაბამისობის სერთიფიკატი გაცემული უნდა იყოს მწარმოებლის და არა მისი ოფიციალური წარმომადგენლობის, დილერის ან სხვა პირის/ორგანიზაციის მიერ.
•ან/და ევროპისთვის გაეროს ეკონომიკური კომისიის (UNECE) მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების მიერ გაცემული შესაბამისი დოკუმენტი, რომელიც შესაძლოა წარმოადგენდეს ავტომობილის ტიპის აღიარების დოკუმენტს ან/და ტესტირების ცენტრის დასკვნას (Vehicle Type Approval Document ან Vehicle Test Report). აღნიშნულ დოკუმენტზე დაინტერესებულმა პირმა უნდა მიმართოს მწარმოებელს, დილერს, ავტომობილის ტიპის აღიარების ორგანოს წარმომავლობის ქვეყანაში ან თავად ჩაუტაროს ტესტირება შესაბამის ცენტრში. UNECE-ის მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების ჩამონათვალი მოცემულია ბმულზე: https://apps.unece.org/WP29_application/List_TA_TS. საქართველოში მსგავსი ტესტირება არ ტარდება.
•ან/და ავტომობილის მწარმოებლის მიერ გაცემული დოკუმენტი, მისაღებია წერილიც, რომელიც გაცემული უნდა იყოს მწარმოებლის და არა მისი ოფიციალური წარმომადგენლობის, დილერის ან სხვა პირის/ორგანიზაციის მიერ. ყველა ამ დოკუმენტში მოცემული უნდა იყოს შესაბამისი ავტომობილის მარკა, ძრავის ნომერი, ძრავის მოცულობა, ამასთანავე, გამონაბოლქვის მონაცემები ან/და გაფრქვევის ეროვნული ზღვრული ნორმების ტოლფასი ან უფრო მაღალი სტანდარტი.
•აშშ-ში ან აშშ-ს ბაზრისთვის წარმოებული ავტომობილებისთვის აღნიშნული დოკუმენტაციის ნაცვლად დაინტერესებულ პირს შეუძლია წარადგინოს აშშ-ს გარემოს დაცვის სააგენტოს მიერ გაცემული შესაბამისობის სერთიფიკატი (EPA Certificate of Conformity), სერთიფიკატის შემაჯამებელი ინფორმაცია (Certificate Summary Information), შესაბამის ავტომობილზე განთავსებული ავტომობილის გაფრქვევების შესახებ ეტიკეტის (Vehicle Emission Control Information – VECI) ფოტოასლი და საიდენტიფიკაციო ნომრ(ებ)ის (VIN) ეტიკეტის ფოტოასლი. ამერიკული შესაბამისობის სერთიფიკატის და სერთიფიკატის შემაჯამებელი ინფორმაციის მოძიების შესახებ ინფორმაცია მოცემულია ბმულზე: https://www.epa.gov/importing-vehicles-and-engines/how-obtain-copy-certificate-conformity-light-duty-vehicle-car-truck. VECI-ის და VIN კოდის ეტიკეტები ძირითადად განთავსებულია ავტომობილის კაპოტქვეშ, თუმცა ისინი სხვა ადგილასაც შეიძლება იყოს განთავსებული.
2. ცხრილში მოცემულ ქვეყნებში სათანადო წელს წარმოებული ერთ წელზე მეტი ასაკის ავტომობილებისთვის, რომლის იმპორტი ხორციელდება სხვა ქვეყნიდან, ზემოთ, 1-ში ჩამოთვლილი საბუთების გარდა, ასევე შესაძლებელია:
•შესაბამისი ავტომობილის მწარმოებლის საქართველოში ოფიციალური წარმომადგენლის/დილერისმიერ გაცემული დოკუმენტის წარმოდგენა, რომელშიც ასახული უნდა იყოს შესაბამისი ავტომობილ(ებ)ის გამონაბოლქვის მონაცემები ან/და გამონაბოლქვის ზღვრული ნორმების ტოლფასი ან უფრო მაღალი სტანდარტი. მწარმოებლის უცხოური წარმომადგენლის/დილერის მიერ გაცემული დოკუმენტი არ მიიღება.
3. ცხრილში მოცემული ქვეყნებიდან ექსპორტირებული ან ამ ქვეყნებში წარმოებული მითითებულ წელზე უფრო ადრე გამოშვებული ავტომობილებისთვის, დაინტერესებულმა პირმა უნდა წარმოადგინოს:
•მწარმოებლის მიერ ინდივიდუალურ ავტომობილზე გაცემული შესაბამისობის სერტიფიკატი (CoC - Certificate of Conformity)
•ან/და ევროპისთვის გაეროს ეკონომიკური კომისიის (UNECE) მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების მიერ გაცემული შესაბამისი დოკუმენტი, რომელშიც ასახული უნდა იყოს შესაბამისი მოდელის ავტომობილის გამონაბოლქვის მონაცემები.
•ევროკავშირსა და გაერთიანებულ სამეფოში წარმოებული ავტომობილებისთვის აღნიშნული დოკუმენტაციის ნაცვლად დაინტერესებულ პირს ასევე შეუძლია წარადგინოს მწარმოებლის მიერ ინდივიდუალურ ავტომობილზე გაცემული დოკუმენტი, რომელშიც ასახული უნდა იყოს შესაბამისი მოდელის ავტომობილის გამონაბოლქვის მონაცემები;
•აშშ-ში ან აშშ-ს ბაზრისთვის წარმოებული ავტომობილებისთვის აღნიშნული დოკუმენტაციის ნაცვლად დაინტერესებულ პირს შეუძლია წარადგინოს აშშ-ს გარემოს დაცვის სააგენტოს მიერ გაცემული შესაბამისობის სერთიფიკატი, სერთიფიკატის შემაჯამებელი ინფორმაცია, შესაბამის ავტომობილზე განთავსებული ავტომობილის გაფრქვევების შესახებ ეტიკეტის ფოტოასლი და საიდენტიფიკაციო ნომრ(ებ)ის ეტიკეტის ფოტოასლი.
4. თუკი არც ექსპორტის და არც წარმოების ქვეყანა არ აკმაყოფილებს მე-6 დანართის მოთხოვნებს, დაინტერესებულმა პირმა უნდა წარმოადგინოს:
•მწარმოებლის მიერ გაცემული ავტომობილის შესაბამისობის სერტიფიკატი (CoC - Certificate of Conformity) და ავტომობილის ტიპის დამტკიცების დოკუმენტი (Vehicle Type Approval Document). შესაბამისობის სერთიფიკატზე მწარმოებლის გარდა დაინტერესებულ პირებს ასევე შეუძლიათ მიმართონ შუალედურ კომპანიებს, რომლებიც სთავაზობენ მომსახურებას ონლაინ, თავად უკავშირდებიან მწარმოებლებს და შეუძლიათ შესაბამისობის სერთიფიკატის ასლის მოწოდება. შესაბამისობის სერთიფიკატი გაცემული უნდა იყოს მწარმოებლის და არა მისი ოფიციალური წარმომადგენლობის, დილერის ან სხვა პირის/ორგანიზაციის მიერ. ავტომობილის ტიპის დამტკიცების დოკუმენტზე დაინტერესებულმა პირმა უნდა მიმართოს მწარმოებელს, დილერს ან ავტომობილის ტიპის აღიარების ორგანოს წარმომავლობის ქვეყანაში. UNECE-ის მიერ აღიარებული ავტომობილის ტიპის დამტკიცების ორგანოების ჩამონათვალი მოცემულია ბმულზე: https://apps.unece.org/WP29_application/List_TA_TS.
•ან/და ევროპისთვის გაეროს ეკონომიკური კომისიის (UNECE) მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების მიერ გაცემული შესაბამისი დოკუმენტი, რომელშიც ასახული უნდა იყოს შესაბამისი მოდელის ავტომობილის გამონაბოლქვის მონაცემები. მსგავსი დოკუმენტი შესაძლოა წარმოადგენდეს ავტომობილის ტიპის აღიარების დოკუმენტს ან/და ტესტირების ცენტრის დასკვნას (Vehicle Type Approval Document ან Vehicle Test Report), რომელზედაც დაინტერესებულმა პირმა უნდა მიმართოს მწარმოებელს, დილერს, ავტომობილის ტიპის აღიარების ორგანოს წარმომავლობის ქვეყანაში ან თავად ჩაუტაროს ტესტირება შესაბამის ცენტრში. UNECE-ის მიერ აღიარებული ავტომობილის ტიპის დამტკიცების ორგანოების/ტექნიკური მომსახურების ცენტრების ჩამონათვალი მოცემულია ბმულზე: https://apps.unece.org/WP29_application/List_TA_TS. საქართველოში მსგავსი ტესტირება არ ტარდება.
•აშშ-ს ბაზრისთვის წარმოებული ავტომობილებისთვის აღნიშნული დოკუმენტაციის ნაცვლად დაინტერესებულ პირს შეუძლია წარადგინოს აშშ-ს გარემოს დაცვის სააგენტოს მიერ გაცემული შესაბამისობის სერთიფიკატი, სერთიფიკატის შემაჯამებელი ინფორმაცია, შესაბამის ავტომობილზე განთავსებული ავტომობილის გაფრქვევების შესახებ ეტიკეტის ფოტოასლი და საიდენტიფიკაციო ნომრ(ებ)ის ეტიკეტის ფოტოასლი.
სამინისტროში წარდგენილ განცხადებას თან უნდა ახლდეს წარდგენილი დოკუმენტ(ებ)ის შესაბამისი ავტომობილ(ებ)ის მარკა, მოდელი, ძრავის ნომერი, ძრავის მოცულობა, გამოშვების წელი, ექსპორტის და წარმოების ქვეყანა და საიდენტიფიკაციო ნომერ(ებ)ი (VIN კოდ(ებ)ი). გთხოვთ იხილოთ თანდართული ცხრილი, რომლის შევსებაც არის რეკომენდირებული ამ კუთხით. განცხადების სამინისტროში წარმოდგენა შესაძლებელია ელექტრონული ფორმით - სამინისტროს ელ-ფოსტაზე (info@mepa.gov.ge) ხელმოწერილი წერილის სახით (იხ. ნიმუში ქვემოთ).