ლაშა დოლიძე მოცვის სეზონის დასრულებასთან დაკავშირებით სექტორის წარმომადგენლებს შეხვდა

გარემოს დაცვისა და სოფლის მეურნეობის მინისტრის მოადგილე ლაშა დოლიძე მოცვის მწარმოებლებსა და იმპორტიორებს შეხვდა. 

შეხვედრის მიზანს, მოცვის სეზონის დასრულებით მიღებული შედეგების შეჯამება, ასევე დარგში არსებული გამოწვევებისა და განვითარების სამომავლო პერსპექტივების განხილვა წარმოადგენდა.

შეხვედრაზე კერძო სექტორის წარმომადგენლებმა სეზონის შედეგები შეაფასეს და მოსავლის რეალიზაციისა და ექსპორტის მიმართულებით არსებულ ვითარებაზე ისაუბრეს. განსაკუთრებული ყურადღება დაეთმო კლიმატის ცვლილების გავლენას მოსავლის ხარისხზე, ფასების დინამიკას, ლოგისტიკურ გამოწვევებსა და საექსპორტო ბაზრების დივერსიფიკაციის მნიშვნელობის საკითხებს.

ლაშა დოლიძის განცხადებით, დარგის მდგრადი განვითარებისთვის მნიშვნელოვანია სახელმწიფოსა და ფერმერებს შორის მუდმივი კომუნიკაცია და თანამშრომლობა, რაც სექტორში არსებული საჭიროებებისა და გამოწვევების გათვალისწინებით ეფექტიანი გადაწყვეტილებების მიღებას უზრუნველყოფს.

„მოცვის სეზონის დასრულება კარგი შესაძლებლობაა მიღებული შედეგებისა და გამოცდილების შეჯამებისთვის, ასევე ფერმერებისა და სექტორის წარმომადგენლების მოსაზრებების მოსასმენად.  მნიშვნელოვანია, რომ წელს მოცვის ექსპორტის მიმართულებით მნიშვნელოვანი ზრდა დაფიქსირდა და ექსპორტის მოცულობამ შარშანდელ მაჩვენებელს მნიშვნელოვნად გადააჭარბა. სამომავლოდ, სეზონის დასაწყისში, მიმდინარეობისას და დასასრულს სექტორთან შეხვედრები რეგულარულად გაიმართება. მნიშვნელოვანია, თითოეული სეზონის გამოცდილება გამოვიყენოთ არსებული გამოწვევების დასაძლევად და ისეთი პირობების შესაქმნელად, რომლებიც ფერმერებს წარმოების კიდევ უფრო განვითარების შესაძლებლობას მისცემს. ჩვენი მიზანია, სექტორთან მუდმივი კომუნიკაციისა და თანამშრომლობის საფუძველზე ხელი შევუწყოთ წარმოების ზრდას, ხარისხის გაუმჯობესებასა და საექსპორტო ბაზრების გაფართოებას, რაც, საბოლოო ჯამში, სექტორის სტაბილურ და მდგრად განვითარებას უზრუნველყოფს“, - განაცხადა მინისტრის მოადგილე ლაშა დოლიძემ.

გარემოს დაცვისა და სოფლის მეურნეობის სამინისტროში გამართულ შეხვედრას მინისტრის მოადგილე ლაშა ავალიანი და სამინისტროს შესაბამისი უწყების ხელმძღვანელი პირები ესწრებოდნენ.