დავით სონღულაშვილი მარნეულში სახელმწიფო მხარდაჭერით შექმნილ სასათბურე მეურნეობის საქმიანობას გაეცნო

გარემოს დაცვისა და სოფლის მეურნეობის მინისტრი დავით სონღულაშვილი, ქვემო ქართლში სამუშაო ვიზიტის ფარგლებში, მარნეულის მუნიციპალიტეტის სოფელ დამია-გეურარხში სახელმწიფო მხარდაჭერით შექმნილ სასათბურე მეურნეობაში იმყოფებოდა.

ფერმერი ანარ სადიკოვი სოფლის განვითარების სააგენტოს რამდენიმე პროგრამის ბენეფიციარია. ანარ სადიკოვმა სასათბურე მეურნეობა პროგრამის „ქართული ბოსტნეული სათბურებიდან“ ფარგლებში მოაწყო. მეურნეობა 3 ჰექტარ ფართობზეა გაშენებული და 400 ტონაზე მეტი პომიდვრის წარმოებაზეა გათვლილი. წარმოებული პროდუქციის რეალიზაცია, ძირითადად, ადგილობრივ ბაზარზე განხორციელდება.

აღსანიშნავია, რომ პროგრამას „ქართული ბოსტნეული სათბურებიდან“, რომელსაც სოფლის განვითარების სააგენტო 2024 წლიდან ახორციელებს, უკვე 270-ზე მეტი ბენეფიციარი ჰყავს. პროგრამის ფარგლებში, 46 ჰექტარ ფართობზე სასათბურე მეურნეობების მოსაწყობად კომერციული ბანკების მიერ 39 მილიონ ლარზე მეტი მოცულობის სესხია გაცემული; მათ შორის, ქვემო ქართლის რეგიონში 10 მილიონ ლარზე მეტი მოცულობის სესხია გაცემული 17 ჰექტარ ფართობზე სასათბურე მეურნეობების შესაქმნელად.